S’Grögeli ufem Löibli

(November 2017)

Es het süferli krooset u schier tönt wie eine vo dene Dräck isugende Iigricht womer landi u landuf Stoubsuger schimpft. D’Houzladli hei zaagig anang gribset u schier tönt wie wenn eine mit Ranzeweh am Weissele wär. Es Ougeblickli het das Grageu ufghört une töiffe Süfzer isch dür die jetz gähnendi Stiui gfladeret. D’Sunne het dür das Gstrüpp, wo äuä es Granium isch, ufe Houzbode vo däm Löibli düre züntet.  Das het dr Bode, wo vor Morgecheuti no ordeli gfröörti Chnoddi hät möge gä, zünftig afa ufwerme. Jetz isch das Grangg wytergange. Lings voder Huustüre richtig Stäge, wo‘s de z’grächtem nizzi gieng. Z’Gätterli vorem erste Stägetritt het däm Usflugsversuech schliesslech es Ändi gsetzt, was wieder zumene verzworglete Süfzer gfühert het. Es energischs Schriesse u dra Schute het däm Hindernis nüt abta u het nume im Fäueli chli quitschet.

Grad wo’s uf die angeri Site rächts vor Huustür hät söue wyter ga, isch e Gaagger ufem Sims vom Gländer näbemene Granium häreghocket. Dä het veiechli Schatte möge gä u het i däm Liecht no grösser u fasch e chli gfürchig gschune. Nacheme Zytli vom Ischetze vo dere gschpässige Erschynig isch das Gförcht aber hantli überwunge gsi u nes wettyfrigs Gschnäder isch losgange. Einisch hets vo ungerufe plagaggeret u  z’anger Mau het dä Gaagger abekrächzet, me hät chönne meine da sigi zwöi Usseriirdeschi am Lafere u verstangi enang no derbi. Wo du aber es Houzchlämmerli i Richtig vo däm Vogu gfloge isch, het dä siner Schwänkere i Gang bracht u isch chräiend derfogflatteret.

Nid lang drufabe isch dä Usflug wyter gange, näbeme Wöschbecki düre, häre zumene aute Wöschzuber us Bläch. Vordranne isch no e Chlämmerlisack useme rot wyss ghüselete Stoff, miteme roschtige Isestängeli dranne gläge. E Hampfele vo dene Chlämmerli dert drinne, hei grad ihre Letscht gha u si samt em Staaufäderli vonanggfloge. Das het hantli ghört, wo eis vo dene, zrugg a d‘Chlööppe gschneut het, d’Bysserli het la zämedrücke u es chlyses Träneli vüre zwängt het. Dr Gwunger, was äch i däm Zuber isch, het das aber grad wie z’Bisiwätter wieder la vergässe.

Jetz aber hantli ueche übere Rand vo däm Blächtrog. D‘Entüschig über dä unerwaret Inhaut machtsech zersch breit, bevor i däm Dräck, wo bis fasch a Rand vom Zuber chunnt, gnuelet wird. Es bricht es gfröits Schnäddere u Grinse us u dä Härd flügt i aui Richtige über d’Ladli vom Löiblibode. Sogar zwüschede Scheieli vom Gländer flügt das Zügs düre u prasslet chräschlend dunge ire Garette, wo zuefäuig ufem Huusplätzli steit. Das komische Grüsch het grad wieder e nöiiä Gwunger erweckt. Gschwing isches zu eim vo dene Späut im Gländer gange, wo e Heugä wienes Härz drigschitte isch. Dert isch‘s Düregüggsle bsungers guet gange u bouzgredi dunge isch grad die Garette gsi, wo die verlockende Grüsch här cho si. Jetz hets aber äbe grad kes Grüsch me gmacht. Du het das Grintschi schier afa röicke vor Verrückti, bis du klar isch gsi, dass für die Grüsch äbe Dräck dür die Späut muess flüge. Nachere zaggige Dräiig hingertsi u wieder füre, hets afa schäppere u chlefele was z’Züg het möge ha. E morz Fröid het das gmacht. Im Härd vo däm Zubber isch ou e chline Momänt no e verblüheti Stude gsetzt gsi. Im nächste Momänt isch die mit Urgwaut dür eis vo dene Härz gmurgset worde, bis si mehrheitlech ou dunge i däm isigä Gfährt glandet isch. Der Räscht vor Stude isch a de Houzscheieli bliebe hange oder isch am Bode glandet, wo sech scho es zünftigs Hüffeli Dräck het breit gmacht. Mittlwerwile het das ganze Löibli usgseh wine Fäudwäg wo früsch ghärdet worde isch.

Ou, was steit de da, ä Chatzegump vom Zubber ewäg, wyter hinge grad wisawy vome Fänschter rächts näbder Tür? Dert ufeme Houzschämeli präsentiert sich es höchs, auts u verpülets Chupferchessi. Eifach z’wyt obe zum chönne driine luege. A däm Chessi hat’s zum Glück zwe Ringe dranne zum das Ding umezträge. Eine vo dene het du derä Gschicht dr wyter Verlouf gä u nachemene grobe Ruck isch das Chessi übere Rand vom Schämeli z’bode gfloge. Wie wets nid angers sy. Natürlech isch dert iischchauts Wasser drinne gsi, wo zersch zur Schockstarri u när es verchlemmts brrruuhh usglöst het. Mit däm Härd u angerem Ghüder wo da zäme ufem Bode umegläge isch, het das e unghüüri Morerei verastatet. Wo z’Stuune über das intressante Ungschick verblasst isch, het’s grüüsli Spass afa mache, i dere Suppe umeznuele u z’ganggle. Nachdäm z’Wasser langsam zwüschede Späut abeglüffe isch gsi, dr Dräck u d’Houzladli dr Räscht ufgsoge hei gha, het das ou nüm gfägt.

Schleppend u scho fasch e chli glängwylet isches zersch mau no chli wyter hingere gäge z’Ändi vom Löibli gange. Zwüsche es paar Bletter u Blüete, wo vo de Granium abgheit u ufem Houzbode umegläge si, isch grad e brune liecht glänzige Chäfer dürekrablet. Bevor’s däm het chönne as Läbige ga, het är sich hantli imene Spaut im Houzbode verschlüffe u het sech dert i Sicherheit bracht.

Auso, wyter geit haut die Reis. No ei bis zwe Meter schnaagge. Dert im Egge vor Huusmuur u em Löibligländer isch es Chörbli am Bode, wo dr Bäru drinne ligt u pfuset. E aute zottlige Bärnersennehung, wo froh isch, wenn är si Rueh u si Friede het. Uf was muessech äch das Viech jetz gfasst mache, chönntmer befürchte. Es chunnt aber grad es Mau disewä. I eire Seelerueh wird zum Bäru zueche gschlüffe. Dä leit, nacheme churze prüfende Blinzler umene chline Schnouppe, sini Tauppe über das zuechegschlüffne Ungetüm. Churz drufabe geit es asynchrons Schnarchle los, schier wie’s ire Militärkasärne nacheme läbhafte Kompaniehinech chönnt orchestriere.

Vo dinne ghörtme schwäri Schritte zueche cho. Es Bizzeli später steit dr Vättu im Türgreis u trout sine Luegerli nid, wo är die Souerei uf däm Löibli gseht. Är risst siner Guggerli wyt uf u hout grad töif Luft zum lut usemööge, wo ihm das Biud mitem Bäru i d‘Lugerli faut. Da heter d’Luft wieder useglah u het es härzigs Grinse über sis Gsicht la zieh. Süferli isch är zu dene zwöine häre düüsselet u het das bunt gschäggete Wuudecheli vom Bode näbem Chörbli ufgläse. Zersch heters mau ordeli usgschüttlet, so dass dr Dräck wo dert druf isch gsi, zu auem angere Gschmöis am Bode prasslet isch. Vorsichtig het är dä Stofffätze über die zwöi gleit, damit ihne nid öbbe no gfrörlige wird. Bsungers, wüu ou aues e chli füecht u vermoret isch gsi. Nid lang u d’Sunne wird de häre möge u die zwöi würd’s de erwerme u tröchne.

Nomau het är das Heugeli vo sim chline Meitschi, zäme mitem Bäru i däm Chörbli belächlet. Für das, dass die no gar nid säber uf ihrne Scheichli het chönne loufe u füüraa nume mit Schnaagge isch vorwärts cho, het das Grögeli auso e plegger Sach uf däm Löibli möge arichte.